ISRO Bharat Ki Shaan
Yosmogen - Igniting Passion, Shaping Futures
Episode: ISRO Bharat Ki Shaan
Aaj me ek kahani shuru karunga uss desh se jiska antriksh (space) ka safar ek church se shuru hua. Aur rocket parts ko launch pad par lejane ke liye cycle ya bailgadi ka prayog hota tha.
Batao wo konsa desh hai? Haan, yeh kahani hamare desh Bharat ki hai, aur hamari space agency ISRO (Indian Space Research Organisation) ki hai. Dr. Vikram Sarabhai aur Dr. APJ Abdul Kalam ji ke nirtatv mein, India ne yeh safar shuru kiya. Dr. Vikram Sarabhai ne space scientists ki madad se ISRO ko ek naya muqam diya.
Rocket aur Satellite: ISRO ki Do Teams ISRO me mainly do cheeze banayi jati hain: Rocket aur Satellite.
- Rocket wo gaadi hai jo kisi bhi saman ya insaan ko space mein le jaati hai.
- Satellite (upgrah) wo machine hai jo prithvi ke charo taraf ghumti hai, signal receive karti hai aur wapas bhejti hai. Jaise mausam ki jankari ya communication ke liye.
- Agar chand ya mangal par jana ho, toh ek mission bheja jata hai. Rocket usse space me le jata hai, aur lander chand ya mangal par utarta hai jisme ek gaadi (rover) wahan chal kar khoj karti hai.
ISRO me do main teams kaam karti hain - ek team rocket banati hai aur dusri team satellite banati hai.
Shuruaati Daur aur Dr. Kalam 1962 me Prime Minister Nehru ji ne Dr. Vikram Sarabhai ko space research shuru karne ko kaha. Dr. Sarabhai ne Dr. APJ Abdul Kalam (jo rocket team mein the) ko Kerala bheja. Wahan ek church ke father ne unhe church ka aangan aur apna kamra rocket testing ke liye de diya. Pehla rocket khada karne ke liye nariyal ke pedo ka sahara liya gaya.
1963 me India ne testing ke liye Russia aur France se "sounding rockets" (testing rockets) mangwaye. In parts ko cycle par rakh kar church ground tak le jaya gaya, aur wahan se pehli baar in rockets ka safal test hua. Iske 6 saal baad, 1969 me Bharat ne APNA pehla sounding rocket launch kiya.
1975 - Aryabhata aur Rohini 1975 me ISRO ki satellite team ne apna pehla satellite banaya - "Aryabhata". Iska wajan 600 kg tha aur tab hamare paas itna powerful rocket nahi tha, isliye isse Russian rocket se launch kiya gaya. Iske baad 1979 me SLV rocket (Satellite Launch Vehicle) banaya gaya aur 1980 me Bharat ne SLV rocket ka istemal karke APNE satellite "Rohini (RS-1)" ko safaltapurvak space me bheja. Iske sath hi Bharat duniya ka satwa (7th) desh ban gaya jisne apne hi rocket se apna satellite bheja ho.
Communication ki Shuruaat 1981 me Bharat ne "APPLE" naam ka pehla communication satellite space me bheja. Issi satellite ko launch pad tak bailgadi me rakh kar le jaya gaya tha! Iske baad 1983 me INSAT (Indian National Satellite System) launch hua, jo itna safal raha ki aaj tak kai INSAT satellites bheje ja chuke hain. Inhi satellites ki wajah se hame TV, Radio aur mausam ki jankari milti hai.
Naye Rockets: ASLV, PSLV aur GSLV Samay ke sath ISRO ne bade rockets banaye: 1987 me ASLV banaya aur 1993 me PSLV (Polar Satellite Launch Vehicle) rocket banaya gaya. PSLV aaj bhi duniya ke sabse saste aur successful rockets mein se ek hai. Fir 2001 me aur bhari satellites ko deep space me le jaane ke liye GSLV rocket banaya gaya.
Chandrayaan aur Mangalyaan Jab rockets aur satellites perfect ho gaye, toh ISRO ne nayi dishao me kadam badhaya. 2008 me Chandrayaan-1 bheja gaya. PSLV rocket se launch kiya gaya yeh duniya ka pehla mission tha jisne Chand par pani ki khoj ki! Iske baad 2013 me ISRO ne ek impossible mission plan kiya - Mangalyaan (Mars Orbiter Mission). Bharat duniya ka pehla desh bana jo apni pehli hi koshish me Mangal grah tak safaltapurvak pahucha.
Bharat ka Apna GPS (NAVIC) 1999 ke Kargil yudh ke dauran jab America ne apne GPS (satellite images) share karne se mana kar diya tha, tabhi Bharat ne thaan liya tha ki woh apna GPS system banayega. 2016 me ISRO ne NAVIC (IRNSS) launch kiya, aur aaj Bharat ke paas apna khud ka satellite navigation system hai.
2017 me ISRO ne ek PSLV rocket se ek sath 104 satellites launch karke world record banaya. Aaj ISRO Gaganyaan mission plan kar raha hai jisme bhartiya antriksh yatri space mein jayenge. 2030 tak Bharat ka apna Space Station banane ka bhi plan hai.
Aaj Humne Kya Seekha:
- Antriksh humara future hai.
- Space ek taqat hai jo desh ko majboot karta hai aur duniya mein apna loha manwata hai.
- Sadhano ke abhav mein agar irade majboot ho toh cycle se shuru karke bhi mangal tak pahucha ja sakta hai.
- "When the going gets tough, the tough gets going" — yeh ISRO par bilkul sahi baithta hai. Lagatar mehnat ke baad unhone har mushkil lakshya ko haasil kiya hai.